أكتر حاجة بتعجبنى فى الغرب والولايات المتحدة الأمريكية أنهم عرايا بيبصوا فى مرآة بيشوفوا عيوبهم ويصلحوها مش زينا بنلبس عشان ندارى عيوبنا.
ودى مش دعوة للعرى لا سمح الله وإنما تعبير مجازى، قأصد منه شيئا هاما وهو الشفافية والصراحة.
لقد امتاز الغرب على مدار العهود السابقة بالشفافية والوضوح ودا كان أهم أسباب نجاحهم بمعنى أنهم بيصارحوا أنفسهم بعيوبهم ويصلحوها.
أما نحن فالعكس تماما بندارى وبندارى لغاية ما تبقى الحبة قبة.
وهنا لا أتجنى على أحد أو لا أريد جلد الذات..
مش هاتكلم عن موضوع دولى سواء العراق أو أمريكا أو إيران..
كلامى منصب على حاجة للأسف موجودة بشدة..
وهى الفقر الشديد فى الخدمات وعلى رأسها تلال الزبالة فى القاهرة والجيزة ممكن حد يقول إيه اللى بتقول عليه دا متتكلم فى حاجة مهمة العولمة الغرب والشرق، ترد عليه وأقوله طظ فى دا كله..
إيه فايدة الكلام فى دا كله..
وإحنا مخوخين من جوا..
بنضجك على نفسنا باستمرار..
للأسف الشديد بلغت عندنا الخدمات مستوى رهيب من التدنى والانخفاض على الرغم من أننا بقينا ندفع أضعاف ما كنا ندفعه فى الخدمات وحدث ولا حرج.
المياه والصرف والطرق الرئيسية فى البلد ظلام فى ظلام فين المحافظ فين وزير الكهربا تكلمهم يقولوا مش إحنا المسئولين فلان وفلان وهيئة كذا وكذا هيه المسئولة، فى حين أن المواطن لا يهمه كل دا المهم إن مشكلته تتحل..
اطلع علي طريق الحسينيه فاقوس وشوف المهزلة وشوف بلد الأمن والأمان على الرغم من إننا عندنا وزير مخصوص للكهربا يا عم كبر.
وتعالى أقرف نفسك أكتر وأكتر شوف أكوام الزبالة وبعد كده فكر، أمال الأمراض بتيجى منين، أمال فين المحافظين فين وزير الصحة فين هيئة النظافة مش بقولك يا عم كبر..
الطرق المرصوفة المكسرة الانفلات المرورى الرهيب مش بقولك يا عم كبر..
محافظين ووزراء وهيئات كل دول بيعملوا إيه مش عارف مش بقولك يا عم كبر، والغريب إننا مش بنعترف بمشاكلنا وبنقول إننا بنصرف معظم الميزانية للدولة على الخدمات وتحسين الأوضاع الاجتماعية بجد أنا مش فاهم حاجة مش بقولك يا عم كبر..
عايز تعرف قد إيه حضارة دولة عظيمة بص على شكل خدماتها وها تعرف مش بقولك يا عم كبر..
بنتكلم فى قضايا مهمة ونسيب قضايا أهم..
نفسى أعرف الوزراء والمحافظين بيركبوا عربيات آخر موديل وبيقبضو أعلى مرتبات بأمارة إيه فهمونى مش بقولك يا عم كبر..
مصرى النيل رواه والخير لسه برضه جواه.
الرصيد
الخبره : 
النقاط : 
موضوع: يا عم كبر 
2010-06-10, 1:47 am
