هاتصدقى

هاتصدقى إنى بحبك بس خايف من الأمل
خايف لحبى يكبر والمصير يبقى الفشل
هاتصدقى إن الليالى سهرتها والعمر راح
فيها شوق وهيام ونشوة والأنين ويا الجراح
هاتصدقى إن عذابى بيكى بالنسبة لىّ أحلى لذة
أو هروبك منى ليكى له فى قلبى ذكرى ومعزة
هاتصدقى إن فى منامى عشت سنين فوق السحاب
وأطير وأشوفك وأسمعك وانتظر منك جواب
هأتصدقى أن عنيكى بحر وموجه عالى كتير خطير
وعلمونى أعوم وأغرق فى البحور وأرجع أطير
هأتصدقى إنى بغير عليكى من أبوكى أو أخوكى
نفسى تبقى ليّه وحدى وعينيّه بس اللى يشفوكى
هأتصدقى إن بأغنى اسمك وأسمعه واصقف لنفسى
وأغنى تانى بلحن تانى وأتخيلك قمرى وشمسى
هأتصدقى إن فى ترحالى أنسى هدومى ويمكن أكلى
ولا أنساكى تمللى فى بالى ويمكن أنسى ناسى وأهلى
هأتصدقى إن ابتسامتك تشفى جروحى كلها
بلسم ومرسوم ع الخدود ما شفت أبداً زيها
هأتصدقى إن صورتك زى فيلم هندى طويل
أنام واصحى وأروح وارجع زى ما هى ما فيش بديل
هأتصدقى إنى صابر على الزمن من غير تعب
لأن طيفك ما يفارقنى حتى لو شفت العجب
هأتصدقى إنك فى قلبى محتلة مكان صمام ووريد
ماقدرش أعيش من غيرك لحظة قريبة أو كنت بعيد
لأ صدقى .. يا حبيبتى إن انتى روح وأنا الجسد
روح جميلة مونسانى ولو هـ اعيش إلى الأبد

الكلام ده ينطبق على ناس كتير قوى من الشباب