ياريت قانون يمنع الرضاعة فى المواصلات العامة

الرضاعة الطبيعية كلها فوايد .. أيون ما قولناش حاجة



بس ما حَبَّكش بقى في المواصلات !!



حاجة مستفزة وشوفتها كتير ،



كأن يعني الواد هيموت من الجوع لو ما رضعش في النص ساعة اللي راكب فيهم الميكروباص !!



اللي يفقع كمان إن أحياناً الست هي اللي بتصحيه علشان يرضع !!



يعني قلة حيا مع سبق الإصرار والترصد !



وياريتها بتبقى في مكان متداري مثلاً أبداًاااااا



دي بتبقى قاعدة ورا السواق يعني كل العربية بكامل عددها شايفاها



بما فيهم السواق واللي جنبه من خلال المراية !



طب انتي مافيش عندك حبة من الأحمر ولا بتحسي



احنا ذنبنا إيه تكسفينا واحنا قاعدين ؟؟



اه ممكن يكون مافيش حاجة من جسمك باينة بس شكلها مستفز



والفكرة مفهومة يعني



في اختراع اسمه ببرونة بيتحط فيها لبن وتأكلي بيها ابنك وانتي في الشارع على فكرة



وفي اختراع تاني اسمه ترضعي ابنك قبل ما تخرجي من البيت على فكرة



وفي اختراع اسمه " حياء " لو جربتيه مرتين او تلاتة هتتعودي عليه وهترتاحي وتريحنا والله




*****



البؤين دول كان نفسي اوي اقولهم لكل واحدة بشوفها بترضع ابنها في المواصلات



حاجة مستفزة بجد وبتدل على إنها بني آدمة لا تصلح أم أساساً



على حد علمي يعني انه خطر على الطفل اساساً انه يرضع في المواصلات



لأنها بتتهز وبتتحرك وممكن يشرق ويموت



وعلى ما أظن إن واحدة بترضع اولادها في المواصلات ما اظنش هتربي ولادها على الحياء



ولا هتزرع في بناتها الاختراع اللي اسمه كسوف



وان جسمها دا حاجة غالية مش المفروض ينكشف على كل من هب ودب



أمنية حياتي بجد انهم يطلعوا قانون يمنع الرضاعة الطبيعية في الأماكن العامة