على إسم مصر-شعر صلاح جاهين

موضوع: على إسم مصر-شعر صلاح جاهين 2009-11-30, 7:24 pm

على اِسم مصر - صلاح جاهين

على اسم مصر التاريخ يقدر يقول ما شاء

وأنا مصر عندي أحب وأجمل الأشياء
باحبها وهي مالكه الأرض شرق وغرب
وباحبها وهي مرميه جريحة ف حرب
باحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هي ف درب
وتلتفت تلاقيني جنبها في الكرب
والنبض ينفض عروقي بألف نغمة وضرب
على اسم مصر

مصر النسيم في الليالي وبياعين الفل

ومرايه بهتانة ع القهوة - أزورها - واطل
القى النديم طل من مطرح منا طليت
والقاها برواز معلق عندنا في البيت
فيه القمر مصطفى كامل حبيب الكل
المصري باشا بشواربه اللي ما عرفوا الذل
ومصر فوقفي الفراندة واسمها جولييت
ولما جيت بعد روميو بربع قرن بكيت
ومسحت دمعي في كمي ومن ساعتها وعيت
على اسم مصر

مصر السما الفزدقي وعصافير معدية

والقلة مملية على الشباك - مندية
والجد قاعد مربع يقرا في الجرنال
الكاتب المصري ذاته مندمج في مقال
ومصر قدامه اكتر كلمة مقرية
قريتها من قبل ما اكتب اسمي بإيديا
ورسمتها في الخيال على أبدع الأشكال
ونزلت أيام صبايا طفت كل مجال
زي المنادي وفؤادي يرتجف بجلال
على اسم مصر
النخل في العالي والنيل ماشي طوالي
معكوسة فيه الصـور - مقلوبة وانا مالي
يا ولاد أنا ف حالي زي النقش في العواميد
زي الهلال اللي فوق مدنة بنوها عبيد
وزي باقي العبيد باجري على عيالي
باجري وخطوي وئيد من تقل أحمالي
محنيه قامتي - وهامتي كأن فيها حديد
وعينيا رمل العريش فيها وملح رشيد
لكني بافتحها زي اللي اتولد من جديد
على اسم مصر

على اسم مصر انا بقولكم
مش هنسكت مش هنسلم
هنخلى العالم يتكلم
عن حضارتنا ومجدنا
وعن شرقنا وغربنا
يا احلى بلد فى الوجود
اسم مكتوب بالورود
نيلك جوا قلبنا
وشعبك بنقوله اننا
مش هنسكت مش هنسلم
وهنخلى العالم يتكلم

» صلاح جاهين فيلسوف الزجل
» اعتماد خورشيد شاهده علي انحرافات صلاح نصر
» اغنية للمطرب صلاح بسيونى الست لما
» أحمد حلمى :: المسلسل الاذاعى :: صلاح الخير
» الجزء التانى كتاب يضم اعترافات اعتماد خورشيد على صلاح نصر