ضد البرادعى ولو كره الشتّامون!

ما إن تجرأت وقلت بعضا مما أتحفنا به البرادعى، ولم أزد على أنهم صنعوا منه نجما، وجعلت منه الآلة الإعلامية الجبارة بطلا شعبيا ظهر فجأة، إلا وكال لى أصحابه ومن يدينون بأفكاره كل اتهام فقالوا عنى ما لم يقله أبونواس فى الخمر، خد عندك عدم ثقافة، حزب وطنى، انت واخد كام من أسيادك، انت من المنتفعين، مكانك فى الصحف القومية ومش عارف حكاية الصحف القومية اللى مزعلاهم قوى كده ياريت حد منكم يكلم حد هناك علشان يودينى والنبى،دا انتوا واصلين لحد امريكا بحالها!!

عموما كل الشكر والتحية للمهاجمين بس عايز واحد يكون جامد منهم ومثقف يقول لى برضه هو مين البرادعى؟ أصل أنا مش مثقف وهى إيه علاقة الثقافة بالبرادعى هو ممنوع أقول رأيى فيه، والنبى ده مش إرهاب، كل واحد مختلف مع البرادعى يبقى قابض كام؟ أنا كان نفسى أشرب مع حضرته نسكافيه باللبن فى الحديقة الجميلة اللى بيعزم أصحابه فيها، ويقول لحبايبنا بتوع 6 إبريل يعملوا وقفة.. مش من المفروض برضه كان راح معاهم بدل من النسكافيه، فين كفاحك مع أولادك،هو تنظير بس.. طيب بلاش كفاحك فين تاريخك النضالى ياحبيبنا بلاش دى كمان.. هو حضرتك افتكرت دلوقت أن مصر بتناديك ولا إيه كانت فين مصر قبل بلوغ حضرتك سن التقاعد؟ الآخرون مازالوا يترنحون فى الطريق، يحلمون ولا أراهم يقدمون فكرا غير الضوضاء وإثارة الحماس فين الفكر فين الحلول طيب هتعملوا إيه فى مشاكلنا؟ لا يوجد رد للأسف شو إعلامى بس، ولا يعرفون ماذا يريدون ولا ماذا يقولون للناس، منهم من يريد للناس أن تهتف يا إما برادعى يا إما بلاش وده عمره ما هيحصل لسبب بسيط جدا إن النسكافيه قرب يخلص ومش هينفع نشترى نسكافيه مصرى لأننا أخدنا على المستورد. شكرا لكل الشتامين، وأهلا بالرأى الذى يقبل الآخر كما يقبل نفسه وبرضه وتأكيدا مش هرشح البرادعى وكل واحد حر ياجماعة، ولا هترهبونى أنا كمان.....