فضايح قاعة القصر بالحسينيه ( صور )

لما سمعنا زمان انهم بيعملوا قاعة افراح كبيره هنا فى بلدنا قولنا ( ياما انت كريم يا رب ) هتنضفى يا بلد

وفجأه بصينا لقينا الموضوع بجد وبقى فى قاعة جميله فى بلدنا أينعم أجرتها غاليه قوى قوى بس عادى الغالى تمنه فيه
وكل الناس اللى كانت بتعمل افراحها فى الزقازيق واسماعليه ومصر قالوا خلاص اهى القاعه بقت موجوده

وفجأه وواحده واحده بقينا نسمع عن حاجات غريبه بتحصل فى الأفراح اللى بتتعمل فى قاعة القصر بالعربى كده فضايح محدش يقبلها فى فرحو خالص مره نسمع عن اتنين موتوا بعض من الضرب على قزازة حاجه ساقعه ومره تانيه نسمع انا واحد من المعازيم نتش الجاتوه من الجرسون وجرى وغيره وغيره وغيره

والغريب فى الموضوع انك لما بيكون عندك فرح هناك بتلاقى اللى انت متعرفهمش اكتر بكتير من اللى انت تعرفهم يعنى أطفال بتدخل من الشارع بملابسهم المقطعه تدور على البيبسى وكأنهم أصحاب المكان ولافى أمن ولا فى رقابه على مظهر المكان رغم ان المكان يبدو نضيف جدا بس ساعة لما بيكون فى فرح كله بيهيص فى الزحمه واللى بيطول حاجه بياخدها

فين السيطره وفين الأمن وفين المقابل نظير المبلغ الكبير اللى بينطلب فى أى فرح ولا احنا بندفع المبارغ الكبيره دى علشان نعمل فضايح لأفراحنا ونأكل ونشرب أطفال الشوارع اللى احنا منعرفهمش

كلمه أخيره حبيت انى اقولها انا بكون سعيد جدا لما بلدنا بتعمل فيها حاجه نضيفه لكن يظهر كده والله واعلم ان زى ما سعد زغلول قال ( مفيش فايده )

يابنى من اول يوم وانا عارف ان القاعه دى هتاخدلها يومين وفيلمها هيتحرق زى اللى قبلها

ده انا لما بيكون فرح حد اعرفه معمول هناك بخاف اروح لأحسن الاقى نفسى تانى يوم على النت

علي فكرة كده مش ينفع خالص

لان الناس اللي في الصور دي انا اعرفهم ودي كده كرامت ناس

ياخي يوم ما تيجي تفضح حد تفضح ولاد بلدك

والله ومن غير زعل انته غلطااااااااااااااااااااااااااااااااااااااااان

وانا مش همسح الموضوع انا هستني رأيكم الاول في مسح الموضوع

بس وافقته مش وافقته انا همسح الموضوع

وبعد كده لما تيجي تحط موضوع زى ده مش تجيب صور ناس من البلد

افرض انهم محتجين تقوم تعمل كده

علي فكرة انته عايز تشهر نفسك علي حساب ولاد بلدك وده
مرفوووووووووووووووووووووووووووووووووض

مع تحياتي

اخوكم / محمد الرومانسي

معلش نسيت اكمل حاجه

انا عايز اعرف ازاى يا صياد بمنتهي السهولة حاطط الموضوع في الاعلانات بتاعت المنتدي

انته مش تعرف الموضوع ده بيكلم عن ايه انا بقي هعرفكم كلكم الموضوع بيكلم عن ايه قريب خالص

نيجي بقي عند المحاسب وبقله انته ظريف او يا محاسب / علي الكلام ده

يابنى
من اول يوم وانا عارف ان القاعه دى هتاخدلها يومين وفيلمها هيتحرق زى اللى
قبلها

ده انا لما بيكون فرح
حد اعرفه معمول هناك بخاف اروح لأحسن الاقى نفسى تانى يوم على النت

اهوا انته قلتها خايف تروح تلاقي نفسك علي النت يعني خايف عارف خايف من ايه

خايف علي كرمتك وطبعا الكل عارف ايه هي معني الكرامة

الكرامة اللي حربنا في 73 عشنها الكرامة اللي الانسان ممكن يموت عشان تفضل كرامته مرفوعه

وكمان بتقول : انا عارف ان القاعه دى هتاخدلها يومين وفيلمها هيتحرق زى اللى
قبلها

ياخي ده بدل ما تقول يارب نكبر ونعلي كمان وكمان

انا عايز اعرفكم حاجه عايز اقلها من زمان بس الحمد لله جه وقتها

عايز اعرفكم ان بلدنا دي عمله زى واحد حط لعبة البيس 2010 اللي مش بتشتغل الا علي جهاز امكانيات عاليا وحطها علي جهاز امكانيات ضعيفه.

هو احنا كده لو عملوا حاجه جديده في بلدنا المفرود اننا نحافظ عليها لا بقي احنا بنعمل العكس
يعني بنبوظ فيها

ولو مش عملوا لينا حاجه نفضل نشكي فيهم ونشتمهم

والله انا عن نفسي بقول

الله يكون في عون الحكومة والله مظلومة معانا

علي العموم اتمني لكم كل خير

مع تحياتي

اخوكم / محمد الرومانسي

بصراحه الموضوع ده حقيقى بنسبة 100 فى 100 لننا كل يوم بنسمع عن فضيحه جديده عن القاعه دى
وانا فاكر ان البوكس مره راح وظبط ناس هناك بيشربوا مخدرات وقفل القاعه فعلا لمدة إسبوع ورجعت اشتغلت تانى والموضوع اتفبرك باين ولا ايه مش عارف

الموضوع ليس به اى شئ خارج حدود الأدب
وطالما الصور كلها حقيقيه وليست مركبه او مفبركه يبقى عادى
وممنوع حزف الموضوع من قبل اى عضو من أعضاء الإداره مهما كانت صلاحياته
وإلا سيعتبر حجر على حريات الأعضاء
من حق كل عضو ان يعبر عن رأيه وليس من حق اى عضو ان يحجر على رأى عضو آخر

حياكم الله

اومال يا قنتيري انته داخل ترد علي الموضوع وطالع علي طول ما تقعد تشرب حاجه مش ينفع كده

هههههههههههه

والله حاجه غريبة

اه فعلا عندك حق يا صياد حقيقة طيب طلامة انتوا مديقين كده من القاعة

متولعه فيها لكن عشان واحد مدايق من القاعه يقوم

يفضح ناس ملهمش اي زنب

طب ليه طيب يا عم اسامة و يا صياد ويا قنتيري

لو لحظتم ان واحد يقرب ليكم في الصور دي ومش تفهموني غلط

كنت ياعم اسامة يا جامد كنت هتحط الصورة اللي فيها قريبك

ههههههههههههههههههه طبعا لا

هو احنا كده عايزين اللي لينا لكن عمرنا ما بنفكر في اللي علينا

وانا قلت كلمة انا فعلا غلطان فيها

اللي هي : همسح الموضوع فعلا انا غلطان

واوعدكم اني من باديت دلوقتي مش همسح اي موضوع نهائيا

بس ردي علي الموضوع هيكون رد نهائي يعني تعتبروه منتهي
هههههههههههههههه

بس انا عايزك يا صياد تبص لحاجه بص كده لو انته مكان ابو العيال دي

ولا مكان اخوهم ولا اختهم وشفت الصور دي

لاخوك هتعمل ايه

هتعملوا ايه انتوا يا اعضاء عالم النجم احمد فتحي

لما تشوفوا اخوكم ولا اختكم مكان العيال دي هتقدروا تمشوا في الشارع
هتقدروا تقابلوا اصحبكم اللي شافوا اخوتكم

انا اعتبروني مش عندي صلحيات اني امسح الموضوع

لكن عندي لسان اقدر اعبر بيه عن الموضوع

وشكرا ليك يا صياد فعلا بصراحة قراراتك كلها سليمة القرار ينزل خلاص مفيش بديل

وانا اول من يأيد قراراتك

وانا اسف انا مقدرش امسح الموضوع

بس خلاص اعتبروني مليش اي صلحيات خالص

قوله بقي زى ما تقوله مراقب عبال ما تفرج مراقب نص قم برحتكم

بس انا عايزكم تحطوا نفسيكم مكان اهالي العيال دول

هو ده اللي انا عايزه

مع تحياتي

اخوكم / محمد الرومانسي

شوف يا محمد يا رومانسى انا مش زعلان ان واحد زيك يبقى مراقب عام ولا زعلان انك عايش في دور الكبير

ولازعلان انك بتعقب على كلامى ولا انا هرد على تعقيبك

اولا ازيك يا محاسب عامل ايه

ثانيا : الكبير هو الله

وانا مش كبير انا عبد الله

وربنا يعلم انا من جو قلبي ايه

وانا مايهمنيش تعقب مش تعقب دي حاجه تخصك

وانا مخلوق عشان اقول كلمة الحق لو علي رقبتي

يا رومانسى متبقاش عامل زى النعام وتدفن راسك فى الرمل عشان تهرب من الحقيقه

الأمر واقع بالفعل وأفراح قاعة القصر كلنا عارفين انها بتبقى بيئه علشان هى دى مستويات بلدنا
وان كنت انت بتقول انك تعرف اصحاب الصور تقدر توريهم الصور وتسألهم ان كانت دى صورهم ولا لأ
وبعدين ما المناظر دى بتحصل فى القاعه كل يوم وانا بنفسى اقدر اجيبلك صور من جوه القاعه أمر من كده بكتير

ودعونى أعود من حيث أتيت

السلام عليكم ورحمة الله وبركاتو
اولا انا ساكت لما اشوف الردود على الموضوع
وانا بكل تاكيد بشكرا جميع الاعضاء اللى بالمنتدى لانهم فعلا فى نقاش دائم وظريف ولكن احب انوة بان اختلاف الرائ لا يفسد للود قضية
ثانيا والاهم بعد ازن جميع الاعضاء ممنوع حزف حرف واحد من الموضوع
وممكن اسأل بعض الاسئلة لكل من اعترض او بداخلة فكرة الاعترض
هل هذا يحصل بقاعة القصر اما لا والاجابة بكل صراحة وصدق بيحصل اكتر من كدة بكتير اما الاحباب الصغار الموجودين بالصور المرفقة مع الموضوع هل هذة الصور مركبة ولا حقيقة همة فعلا الموجودين حقيقة ودة بيحصل ..اولا يا رومانسى مش عيب اننا نتقدم ولكن بالطريقة دى والله عمرنا ما حنشوف التقدم فعلا زى ما قالو الاخوة الاعضاء كل شئ جديد فى البلد بياخد يومين وينتهى ويبقى عادى ويكون انيل من كدة كمان انابكون فى اوقات كتير من الناس اللى بكونو معزومين بالقاعة ومش بروح هناك بسبب كدة
اما يا محمد ارومانسى اهل العيال دول لو عايزين يربو عيالهم كانو ربوهم ومش تركوهم للتسول
وشكرا ليكم جميعا

انا اسف ليكم يا رجالة واعمله اللي انتوا عايزنوا

ومتشكر يا جزار

وشكرا يا استاذ محمد

فعلا انا اللي برجع المنتدي لوره ماشي ياعم انا اسف ليك

وانا عارف ان الصور حقيقة ومش بحط راسي في الرمل زى ما قال الجزار

وانتوا عارفين ان الرومانسي هو اللي بيبحث عن الحقيقة

وعلي العموم انا اسف ليكم

وشكرا

بتأسف ليه يا رومانسى هوه انت عملت حاجه غلط انت بتقول

رائيك وكل واحد حر فى رائيه

اقتباس :

فعلا انا اللي برجع المنتدي لوره ماشي ياعم انا اسف ليك

مش تقول كده يا رومانسى

مع احترامى لجميع اعضاء المنتدى

انا من رائيى لو الرومانسى انسحب من المنتدى

المنتدى هيبوظ من الصبح

اقتباس :

وانتوا عارفين ان الرومانسي هو اللي بيبحث عن الحقيقة

طبعا عارفين ومتاكدين من ده كويس

واما بالنسبه لااى حد يقول الرومانسى بهرب من الحقيقه

يبقى ده انسان تافه لان الرومانسى هوه الحقيقه والحقيقه هى الرومانسى

ــــــــــــــــــــــــــــــــــــــــــــــــــــــــــــــ

اما بقى بالنسبه للموضوع قاعه القصر

اولا / اما من رائى القاعه دى تنقفل من الصبح

ثانيا / ومن غير ما تجيب الصور احنا عارفين اللى بحصل فى القاعه كل يوم

ثالثا / بلدنا دى عاوزه حاجه واحده فقط عشان تبقى بلد

عاوزه الصداقه الامانه الحب

بس للاسف ولا فيه ولا صداقه ولا امانه ولا حب

بس الحمد الله على كل شئ
والله العظيم يا جماعه نحمت الله سبحانه وتعالى على النعمه اللى احنا فيها

يا جماعه مسجد الاقصى اسرائيل احتلو وانتو هنا عاملين تقول قاعه ومش قاعه والله حرام عليكم

سبوكم من الكلام الفاضى ده

اللهم منصر المسجد الاقصى

الموضوع ده مش بيحصل فى بلدكم وبس لأ كل بلد فيها الحلو والوحش

ودى حاجه مش تحرج حد لأنكم مش مسئولين عن تصرفات الأطفال دى
كل اللى عليكوا تعملوه هو مقاطعة الأماكن اللى زى دى
واللى بتجمع فيها اشكال زى دى

قاهر مملكة السحر

اولن انا زى زى كتير من الشباب بالبلد كنا فرحا نين مان فية قاعة جامدة هتفتح بالبلد وعلى مستوى جامد وفعلا كانت فخر لينا بس بعد مافتحت بدئت عيوب تظهر كتير زى سعرها المبالغ فية وكمان التقنيين الى فيها زى وحدة الفديو والكامير مان سورى مش بروفشنل فى احسن منهم كتير وكمان الليز المهندس المسؤل عنة دون المستوى عندة اخطا كتير والدى جى مان هما 20اغنية الى حافظهم بيشغلهم فى كل فرح والامن الى هو سبب المشكلة دى كلها اتمنى من المسؤلين عنها يتلافو العيوب الى موجود فى اقرب وقت انا مابقصد اجرح حد بس انا زعلت بس على المستوى الى هى وصلتلو اتمنى اكون عضو خفيف على قلوبكم

اتكلموا فى حاجه تستاهل الكلام 0000اننا نطيل الكلام عندما لا يكوت لا لدينا ما نقوله 00000اللى عاجه القاعه يروح يعمل افراحه فيها واللى مش عاجبه ما يدخلهاش وشكرا الموضوع خلص

يا عم حلو اهى اسمها قاعه باردو واحسن من مفيش
واللى عاجبه يروح واللى مش عاجبه مايروحش

المفروض ياجماعه بدل متوقعدوا تعاتبوا في بعض وتغلطوا في بعض كان واحد فيكوا يسال العيب في مين فيناولا في القاعه النضيفه اللى اتعملت في بلدنا ولا فى اى مشروع اتعمل وفشل ولا العيب في اصحاب المشروع ولا العيب فينا احنا من اساسوه انا عايزه بس اقولكلوا ان مش دى الطريقه اللى بيفكروا بيها اولاد البلد واعتبروا الكلام ده من واحده مجهوله ملهاش علاقه بيكوا من اساسوه

العيب علينا احنا الي بنسمح لغيرنا التحكم فينا ومش تنسو قاعه نادي المعلمين الي بتوع القصر خدوها لاسباب الكل عارفها ولما تكون في حاجه نضيفه لزم نحافظ عليها
انا سمعت ان في قاعه جامده في النادي الرياضي بس لسه محدش خدها
ربنا يستر ليخدوها هي كمان واحنا لسه واقفين

ما طار طير وارتفع

الا كما طار وقع

يا شباب العنوان غير الموضوع المقصود انا تخيلت ناس ولا مؤاخذة
لكن الواضخ انه مكان مش امين انه تعمل فى اى مناسبة ياريت نصلح وبلاش نهد